بحـث
 
 

نتائج البحث
 


Rechercher بحث متقدم


هوي ياوليد....

استعرض الموضوع السابق استعرض الموضوع التالي اذهب الى الأسفل

هوي ياوليد....

مُساهمة  سيف النصر في 21/9/2010, 06:37

هوي يا وليد يا دلوعه يا مرنوعه
اعدل ايدك المفدوعه
واتلحلح واقيف دوغري
و واس صدرك مع صدري
واشجع
وليك الحق
وهوي ياوليد
ليك الحق عشان ولدوك فوق اسفنج
وحتي اول جديد سوهو ليك بالبنج
وهسع هوايتك انك تلعب البنق بنق
وليك الحـــــــــــــق
عشان فطموك بعد ما زدت فوق سنتين
وفي سن عشرة كان نومك علي اليدين
غطاك بالشاش وفرشك بي حرير الصين
والبدورا كلها تلقاها قاب قوسين
ابوك مليان وقلبوا سمين وجيبو سمين
وفاتحلك حساب في البنك والتامين
وليك الحــــــــــــــــق
عشان ما خضت في وحل المطر والطين
ومن الترعة ما سويت شراب الهين
وما قيلت في ضل دومة بفرعين
وما شاققت عرق النيل مع الوزين
وليك الحـــــــــــــــــــــــق
عشان ادمنت عيشة اللين
ومشي الأسفلت ما جربتو بالكرعين
وركوب اللوري في شمسا تصر العين
وما عانيت وقوف الصف ورا التموين
وليك الحـــــــــــــــــــــــــــــــــق
وعشان انت ما بتدري سجل أبواتك البدري
دحين أسمــــــــــــــــــع
سماك الباكي مجدو الزال ويا ما كان تحتو رجال
أبو خنجر وأبو شوتال والصقر البجيك خوجال
سوطن كان يمين جلجال ومكسين كمال وجلال
لكن الزمن اسرع
سيفن بلحس الفقرة وما كانو برضو بالحقرة
وكانو بيضبحوا الشقرا وكانو بضوقو العادوهو نوم الكوع
وكانو بموتوفي شان حرمة الممنوع ولا هسع
الجعلي الشرابن حار وقالو بيعدي يومو خنق
والشايقي البياكل النار وفوقو نحاسو متخنق
ودرفون البجا الصقار وحادب سيفو ياكلو الشبتي
والغرباوي عينو شرار وكضب القال عندو عرق
والنيلي البيعرفو كتار علي كتل الأسود جرق
والبطحاني والشكري وغيرهم من اهل فخري
ومنهم أصلي لا بشبع ولا بقنع
حصل جربت كب السارية في فرقة خلا العتمور
وشفت بروقا تتحرقص وتتمرقص تقول مطوية في قرقور
والحصحاص يمرقو السيل يكسرو علي معادي الخور
وقلب الصاقعة يتفقش يكب النار دمار وشرور
وشفت الحال غرق مقلوع جبل متروم وفرع مكسور
جمال غرقانة بحالها حد الموية في القرقور
ود ابن ادم المسكين نجاتو تحت قرون التور
والعوتيب عليك يجري يشيلك وأنت ما بتدري
هــــــــــــوي يا ولــــــــــــــــيد
حصل سادرت بالذيداب وقدامك مراحك وراكب الخضاب
ودربك طول عاد العين سحاب وغبار وموتو سراب
هوي كرباجك البكاي يبكي علي ضهور الضمر الأنجاب
وتسري الليل وما بضوق هجعة لو كل النجم ما غاب
وبعد ايام تجيك لفتة ويلوح لك في البوادي سحاب
وتكرش من دعاش العينة تبقي سراب
تلقي الوادي خدر تقول زي ما كان سراب ويباب
ريت ام شاق تقيل من ضحاها علي المعالم وقيمة الهبهاب
وتفرش ليك حزمة نال تحت سيالة تريانة وفروعها قراب
وتنفخ كل آهاتك مع المزمار
تصوغ الحان ملانة شباب وتنسي الدنيا كل الدنيا
ما عندك معاها حساب
خلاف برقا يشيل حرقاص ورعدا تقول رصاص
وكت فرقع
هوووووووووووي يا ولييييييييييييييييييييييييد



هوي يا وليد
حصل صحاك عز الهجعة حس شتما بعيد مخنوق
وجاتك صرخة الطنباري مشتاقا يسوي القوق
ونومك طار واتقسم والرشرش صبح مفروق
واتلفحت نص من توبك الجرجار علي الدلوكة سائق سوق
وتلقي هناك بنات بلدك ولاد بلدك يعلو الصفقة
تقدح في القلوب الشوق
نغم الفال أبشرن يا بنات بالخير
و الجنيات تطير لا فوق
وكم زغرودة تتفجر تفور بالناس بعدما تروق
يعومن للصدور وتشابي للمجهول وما بتضوق
تبين زينوبة زي البان يمين وشمال توري الطوق
واخوان ام شلخ ينكبو جوه الدارة زي صقرا
نزل من فوق
ضرب السوط والركزة بيفرق الناس
عشان زينوبة ما بتحوق
وعاد تتحزم الجنيات وتتنظم تقيف في روق
وكل واحد بيجر ضرعاتو والحجبات ترف لافوق
ضفير الخوسة فايت الكوع وسيرو مع العضل مطبوع
والطاقية تحت الحاجب المعقود
هدية ام زين وما مشرية من السوق
وبتقدم عريس السمحة راكب سوط الكانو بسقوبيهو التوق
والعنجاري ينزل فوق ضهورهم بس تقول منشحطة فيها عروق
يبدا مجره بالترقوة مع الضلع القصار ولصوق
واحمر عين يشم الدم بعدما يرش بنات عمو ويزيدن شوق
وثابت حيطة لا بتحني ولا بتلز وصاري جبينو كلو عروق
وقال بعد العقد طلقانة ما بحجزوه الا يخلو ضهرو شقوق
هناك الحال مغير جد...هيجة الناس تفوت الحد
وكان حجازو مد اليد بتسمع كــــــــــــــــع
هووووووي يا وليد


حصل شارفت دغشاً بدري
فوق حَجْرَة مخانق النيل
في سنة التساب و الشرقي
حزم القيف و طفح الكيل
و شفت الهيبة فوق أسيادا
و الشخري البكتل الحيل
و شفت الجاري يحفر في جروف كوكبنا
بس داير يشقو عديل
يجيك بي صدرو متحزم و متلقف صفوف في صفوف
يحاكي الخيل
و مويتو الهايجة تبلع جب
و تجغم في مدالق السيل
و فوق الرملة مشرور العشاري طويل
معشعش بين نوايبو الطير
حليلو جزايرو جاها النيل
و حالف ما يخلي شبير
حزم أطرافا يكسر فيها
بالهدّام و ينحر فيها بالقرقير
و بكره يموصا يشرب طينا
يزرع فيها شلالات هدير و هدير
و تكسح مركب النوَّاته عايمي
على قرون الموج جناحا كسير
روَّاسيها مالي أصابعو في المجداف
يقوم لا فوق و يجي من تاني فوق الدفّة
رافع ايدو ينده جملة الصُّلاح و أهل الخير
هناك الموت يمين شافوهو شوف العين
و مافي شفيع و ما في مجير
تقول الزول يعرف أجلو
و مكان موتو لولا أنو ما كشفو الإله لي غير
عاد ما دام رقاب الموج تمد لسناتا
فوق للقيف تكُبَّ الصِير
و شن فضَّل بلا الغرق البدور ناعي
و فعلاً كان و ياهو مصير
مشية المركب الغرقاني بين موجتين
طفّروا منها النوَّّاته بطن اللُّجَّه قالوا أخير
تماسيحاً يقالدوا الموج يصارعوا
عتاوة العرق الكِتَالو مرير
ساعه يعوموا بالضرعات و ساعةً فَجْ
صدورُنْ ضُمَّه ما اتبلّت و لو قطّير
ديل يا وليد ولاد النيل
رضعوا الهيجة من صدرو
و من الطيبة رضعوا كتير
الواحد فعايلو كُتُر و نضمُو دقَّاق
نَهِرتُو يمين تسوي الفاق
و مراً أصلو لا ضاقوهو لا بنضاق
خلاص يا وليد كفاك فاقه
و أنا تهت في الأشواق و ما برجع
و هسع ضمَّه لا شايفك و لا بسمع

طبعا ما قاصدين كل الاولاد... Laughing Laughing



lkr lkr

حقوق النسخ والنقل محفوظة LKL: LKL: LKL: LKL:

سيف النصر

عدد الرسائل : 15
العمر : 25
الموقع : any time any where
رقم الدفعه : 12
نقاط : 2414
تاريخ التسجيل : 13/08/2010

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى